05/03/2024
🥛🍼 ХӨХНИЙ СҮҮГ ЗОХИСТОЙ ХАДГАЛЖ, БЭЛТГЭХ НЬ,
📢 АНУ-ын Өвчний хяналт, сэргийлэлтийн төвийн зөвлөгөө
Хөхүүл эхчүүд болон хөхүүл хүүхэд асран хамгаалагчид нь дараах байдлаар зөвлөсөн хөхний сүү хадгалах болон бэлтгэх техникийг мөрдсөнөөр хүүхдийн эрүүл мэндэд зориулагдсан саасан сүүний аюулгүй байдал, чанарыг хадгалах юм.
Хүний сүүг хэр удаан аюулгүй хадгалах вэ гэдэгт олон хүчин зүйлс (сүүний хэмжээ, сүүг саах үеийн өрөөний температур, хөргөгч болон хөлдөөгчний температурын хэлбэлзэл, орчны ариун цэвэр) нөлөөлж болно.
📌 Саасан хөхний сүүг аюулгүй хадгалах
Хөхний сүүг саахаасаа өмнө:
🔹 Гараа саван болон усаар сайтар угаа савангаар угаах боломжгүй тохиолдолд 60%-аас доошгүй алкохол суурьтай гар ариутгагч хэрэглээрэй
🔹 Эхчүүд хөхний сүүгээ гараар эсвэл гар саалтуур/цахилгаан саалтуураар сааж болно.
🔹 Саалтуур ашиглаж байгаа тохиолдолд саалтуурын бүрдэл хэсгүүд, хоолой зэрэг нь цэвэрхэн байгаа эсэхийг шалгаарай. Хоолой нь өнгөртэй, бохирдсон байвал нэн даруй сольж, хэрэглэхээс зайлсхийгээрэй.
🔹 Дундын саалтуур хэрэглэж байгаа тохиолдолд түүний эд анги, удирдлага, зэргийг цэвэрлэж, гадаргууг нь нойтон сальфеткаар арчина.
📌 Хөхний сүүг саасны дараа хадгалах
❓ Танд ажил дээрээ хөхний сүүгээ хэрхэн хадгалах, эрчим хүчгүй үед яах вэ гэх мэт хөхний сүүг хадгалахтай холбоотой өөр асуулт байвал "Түгээмэл асуулт, хариултууд" Frequently Asked Questions хэсэгт зочлоорой.
🔸 Хөхний сүүний уут эсвэл хөхний сүү хадгалах цэвэр - хүнсний зориулалттай, таг нь сайн таглагддаг шилэн эсвэл хуванцар сав ашиглана.
❗️Дахиварын 7 тэмдэглэгээтэй буюу сав нь BPA агууламжтай пластикийн орцтой байж болохыг заасан сав хэрэглэхээс зайлсхий.
🔸 Хөхний сүүг хөхний сүү хадгалах зориулалтын биш 1 удаагийн сав, пластик уутанд хэзээ ч бүү хадгалаарай.
🔸 Дөнгөж саасан сүүг дараах байдлаар хадгалж болно. Үүнд:
✅ Тасалгааны температурт (25 хэм буюу 77F) 4 хүртэл цаг;
✅ Хөргүүрт 4 хүртэл өдөр;
✅ Хөлдөөгчинд 6 хүртэл сар орчим хадгалвал хамгийн тохиромжтой (12 сар хүртэл хадгалах боломжтой). Хэдийгээр хөлдөөх арга нь хүнсийг бараг л тодорхой хугацаагүйгээр аюулгүй хадгалах боловч зөвлөсөн хадгалах хугацааг мөрдөх нь чанарт онцгой ач холбогдолтой.
📌 Хадгалах зөвлөмж
🔹 Хөхний сүүг хэзээ саасныг тодорхой тэмдэглэнэ.
🔹 Хөхний сүүг хөргүүр болон хөлдөөгчний хаалганд бүү хадгал. Ингэснээр хөхний сүүг хаалга нээгдэж, хаагдахад үүсэх температурын өөрчлөлтөөс хамгаалахад тустай.
🔹 Хэрэв та шинэ саасан сүүгээ 4 хоногийн дотор хэрэглэхгүй гэж бодож байгаа бол сүүгээ нэн даруй хөлдөөгөөрэй. Энэ нь хөхний сүүний чанарыг хадгалахад тусална.
🔹 Хөхний сүүг 60-120 мл (2-4 ounces)-ээр (эсвэл 1 удаа хооллох хэмжээгээр нь) багаар хөлдөөснөөр ууж дуусгаагүй үлдсэн сүүг үрэгдэхээс зайлсхийнэ.
🔹 Хөхний сүү хөлдөхөөрөө тэлдэг учир сүүг хөлдөөхдөө тухайн савныхаа дээд хэсэгт 2,5 см орчим (1 inch) зай үлдээнэ.
🔹 Хэрэв та хөхний сүүг хүүхэд асран халамжлагчид хүргүүлэх бол сүүний саван дээр хүүхдийн нэрийг тодорхой тэмдэглэж, хүүхэд асран халамжлагчид хөхний сүүг тэмдэглэх болон хадгалах бусад шаардлагуудыг хэлж өгөөрэй.
🔹 Та аялалд яваа үедээ хөхний сүүгээ зориулалтын тусгаарлагч бүхий сэрүүн цүнхэнд мөсний хамт 24 хүртэл цаг хадгалж болно. Хүрэх газраа хүрмэгцээ сүүг тэр даруйд хэрэглэх эсвэл хөргүүрт, хөлдөөгчинд хадгалах нь зүйтэй.
📌 Хөхний сүүг аюулгүй гэсгээх
🔸 Хуучин сүүг үргэлж түрүүнд нь гэсгээгээрэй. Түрүүлж хөлдөөснийг түрүүлж хэрэглэнэ гэдгийг санаарай. Удаан хадгалах нь хөхний сүүний чанарыг бууруулж болзошгүй.
🔸 Хөхний сүүг гэсгээх хэд хэдэн арга бий. Үүнд:
✅ Хөргүүрт шөнийн турш байлгах;
✅ Бүлээн эсвэл бүлээвтэр устай саванд байлгах;
✅ Бүлээвтэр урсгал усан доор байлгах зэрэг аргууд хамаарна.
🔸 Хөхний сүүг хэзээ ч бүү богино долгионы зууханд гэсгээ, халаа. Богино долгионы зуух ашигласнаар хөхний сүүний шим тэжээл үгүй болж, халуун толбууд үүсгэж, хүүхдийн амыг түлэх боломжтой.
🔸 Хөхний сүүг хөргүүрт гэсгээснээс хойш 24 цагийн дотор (сүү хөлдүү байхаа больж, бүрэн гэссэн үеэс энэ хугацааг тоолох бөгөөд сүүг хөлдөөгчнөөс гаргасан хугацаанаас тоолохгүй) хэрэглэнэ.
🔸 Хөхний сүүг хөргүүр болон хөлдөөгчнөөс тасалгааны температурт нэгэнт гаргасан эсвэл бүлээсгэсэн бол 2 цагийн дотор хэрэглэнэ.
🔸 Хөхний сүүг гэсгээсэн л бол хэзээ ч бүү дахин хөлдөө.
📌 Хөхний саасан сүүгээр хооллох
🔹 Хөхний сүүг халаах шаардлагагүй байдаг. Үүнийг тасалгааны температурт эсвэл түүнээс хүйтнээр хэрэглэж болно.
🔹 Хэрэв та хөхний сүүг халаахаар шийдсэн бол дараах зарим аргыг анхаарна уу. Үүнд:
✅ Сүүг халаах явцдаа савыг нь сайтар битүүмжилнэ.
✅ Хөхний сүүг тусдаа савтай бүлээн усанд савтай нь хэдэн минут хийх, эсвэл бүлээн (халуун биш) урсгал усанд савтай нь хэдэн минут барих маягаар халаана.
✅ Хөхний сүүг зуух болон богино долгионы шарах шүүгээнд шууд халааж болохгүй.
✅ Хүүхдээ хооллохоос өмнө хөхний сүүний температурыг бугуйн дээрээ дусааж, шалгана. Сүү халуун биш бүлээн байх ёстой.
🔹 Хөхний сүүний тос нь тусдаа ялгарсан байж болзошгүй тул сүүгээ өнхрүүлж, эргүүлээрэй (Админ: Сэгсэрч болдоггүй).
🔹 Хэрэв хүүхэд тань угжсан сүүгээ бүрэн ууж дуусгаагүй бол үлдсэн сүүг нь хүүхэд хооллож дууссанаас хойш 2 цагийн дотор хэрэглэнэ. 2 цагийн дараанаас үлдэгдэл сүүг хаях хэрэгтэй.
📌Нялхсыг хооллох хэрэгслүүд болон саалтуурыг аюулгүй цэвэрлэх
Хөхний саалтуур, хүүхдийн угж ба бусад хоолны хэрэгслүүдийг нь болгоомжтой цэвэрлэж, ариутгаж, хадгалах нь хөхний сүүг тань бохирдлоос хамгаалахад тустай. Өвчний хяналт, сэргийлэлтийн төвөөс хөхний саалтуур болон нялхсыг хооллох хэрэгслүүдийг хэрхэн аюулгүй цэвэрлэх тухай зөвлөмж гаргасан байдаг.
🌱 Эх сурвалж: CDC. gov
