28/08/2026
PANALANGIN PARA SA MGA KABABAYANG APEKTADO NG BAHA AT MALAKAS NA ULAN
Panginoong Diyos, Hari ng sansinukob,
Kami ay walang hanggang nagpapasalamat sa buhay na Iyong ipinagkaloob sa bawat isa sa amin. Ikaw ang makapangyarihang Diyos, ang Lumikha ng lahat ng bagay dito sa mundo.
Kami ay buong pagpapakumbabang lumalapit sa Iyo. Patawarin Mo po kami sa aming mga kasalanan. Bigyan Mo kami ng pusong tunay na nagpapakumbaba, marunong magsisi, at patuloy na naghahangad na mamuhay ayon sa Iyong kalooban.
Panginoon, buong puso kaming dumadalangin para sa aming mga kababayang naninirahan sa mga lugar na binabaha, lalo na sa mga malapit sa ilog, dagat, at iba pang anyong tubig. Ingatan Mo po sila at ang kanilang mga pamilya. Ilayo Mo sila sa anumang panganib at pagkalooban Mo sila ng kaligtasan, malinaw na pag-iisip, at malakas na pangangatawan.
Gabayan Mo rin po ang aming mga pinuno at mga taong nasa tungkulin. Bigyan Mo sila ng pusong mahabagin, karunungan, sapat na kaalaman, at tapang upang makagawa ng mga tamang desisyon at mailigtas ang mga taong nangangailangan ng tulong.
Panginoon, nauunawaan namin na sa harap ng mga ganitong pangyayari, naaalala namin na kami ay mga tao lamang—may mga limitasyon at hindi namin kayang kontrolin ang lahat ng bagay. Kaya naman lalo kaming kumakapit sa Iyong habag, awa, at biyaya.
Kung Iyong mamarapatin, Panginoon, nawa'y humina at tumigil na ang malakas na ulan. Nawa'y bumaba na ang tubig at maging ligtas na muli ang aming mga komunidad.
Patuloy Mo po kaming protektahan, turuan, at ipaalala na sa anumang pagsubok, hindi kami nag-iisa sapagkat Ikaw ay laging kasama namin.
Maraming salamat po, Diyos Ama, sa Iyong walang hanggang pagmamahal at pagkalinga.
Ito ang aming dalangin, sa ngalan ni Hesus, na aming Panginoon at Tagapagligtas.
Amen.
