16/10/2025
دنیا کے امیر ترین شخص ایلون مسک کی ایک پوسٹ نے نیٹ فلکس کو جھنجھوڑ کر رکھ دیا۔ چند جملوں نے وہ کام کر دکھایا جو کئی بڑی کمپنیاں برسوں میں بھی نہیں کر سکتیں. نیٹ فلکس کی اربوں ڈالر کی مالیت ہوا ہو گئی۔
بات شروع ہوئی جب ایلون مسک نے اپنے سوشل میڈیا پلیٹ فارم ‘ایکس’ پر صارفین سے کہا کہ وہ نیٹ فلکس کی سبسکرپشن ختم کر دیں، کیونکہ ان کے مطابق یہ پلیٹ فارم ایسا مواد دکھا رہا ہے جو معاشرتی اقدار اور بچوں کی ذہنی نشوونما کے لیے نقصان دہ ہے۔ ان کی پوسٹ نے سوشل میڈیا پر طوفان برپا کر دیا۔
چند گھنٹوں میں ہی “Cancel Netflix” کا ہیش ٹیگ دنیا بھر میں ٹرینڈ کرنے لگا۔ ہزاروں صارفین نے اپنی سبسکرپشن منسوخ کرنے کے اسکرین شاٹس شیئر کیے۔ نتیجہ یہ نکلا کہ نیٹ فلکس کے شیئرز 4.3 فیصد گر گئے اور کمپنی کی مارکیٹ ویلیو تقریباً 25 ارب ڈالر کم ہو گئی۔
نیٹ فلکس پر طویل عرصے سے یہ الزام لگ رہا ہے کہ وہ ایسے شوز کو فروغ دے رہی ہے جو متنازع اور بعض حلقوں کے نزدیک غیر اخلاقی ہیں۔ ایلون مسک کی پوسٹ نے اس بحث کو ایک نئے موڑ پر پہنچا دیا۔ انہوں نے واضح الفاظ میں کہا کہ “اپنے بچوں کی بھلائی کے لیے نیٹ فلکس بند کریں۔”
اس ایک بیان نے سرمایہ کاروں، صارفین اور نیٹ فلکس انتظامیہ سب کو سوچنے پر مجبور کر دیا ہے۔ شاید اب یہ صرف ایک سوشل میڈیا تنازع نہیں بلکہ اس بات کا اشارہ ہے کہ عوامی اثر و رسوخ رکھنے والے افراد جب بولتے ہیں تو اربوں ڈالر لمحوں میں حرکت میں آ جاتے ہیں۔
