17/05/2026
Ons het die boodskap ontvang van Maryna af. Dis 'n voorreg om julle met 'n rolstoel te seën.
Liefste Riaan, Mari en Generosity Pay-it-Forward,
Hoe kan ons julle ooit genoeg bedank vir die hulp met die rolstoel vir my boetie, Andre? Was dit nie vir mense soos julle nie, weet ek nie wat ons sou doen nie.
Andre het verskeie terugslae gehad gedurende 2025 — twee hartaanvalle en in Mei maand ook ’n beroerte. Hy het moeilik herstel en baie gesukkel om weer oor die weg te kom. In Desember wou die dokters sy been amputeer as gevolg van geen pulse in sy been nie. Ons as familie het mooi met die dokters gepraat en die Here gevra om ons by te staan met hierdie groot stap. Deur die operasie kon die dokters sy been spaar, en ons dank die Here elke dag daarvoor.
Hy het steeds baie hulp nodig, en die rolstoel kom ongelooflik handig te pas. Nogmaals, baie dankie vir hierdie GROOT skenking. Ons het eenvoudig nie genoeg woorde om ons dankbaarheid uit te spreek nie.
Baie sterkte vir julle en die wonderlike werk wat julle doen. Ons kan beslis aanbeveel dat mense julle moet aanhou ondersteun — die werk wat julle doen is absoluut wonderlik en maak ’n groot verskil in mense se lewens.
